Agerrud bu snat tyemmatin


Nnig n tneflit i as-d-yettunefken s γur Axellaq, Sidna Sliman yettwabudd-d daγen s twassna tameqqrant. S twassna-ya, yessawaḍ ad yefru kra n tlufa umi wer yezmir umdan ad yaf tifrat. Yiwen wass, usant-d γer teγremt n Sidna Sliman snat tlawin, yiwet d timizwiγt tayeḍ d timibrikt. Yal yiwet deg-sent teddem-d agerrud deg ufus is. Igerruden-nni ttemcabin aṭas, maca yiwen deg-sen d amuddir wayeḍ d amettin. Sersent snat tlawin-nni igerruden-nsent sdat n weεric n ugellid, qqumcent, bdunt la d-ḥekkunt ayen tent-id-yewwin γer dinna. Agellid yesmuzgut-asent s uhannay ameqqran.

“Ay-Unnig-nsen ”, d-tebda tmeṭṭut timizwiγt, “Nekk ttidireγ di yiwen wexxam akked tmeṭṭuta ; nettat d takna-inu. Azal n wagur aya, s kra n wussan kan gar-anteγ, i snat yid-nteγ nurew-d sin yigerruden yellan s tezmert timgerrezt. Armi d iḍelli tameddit, agerrud n tmeṭṭut-a yebda yettiẓẓif. Netta ad yili yemmut kra n tsaεtin deffir mi nessexsi tafat akken ad neṭṭes. Ur yefaq yiwen s wayen yeḍran i ugerrud-a siwa yemma-s. Dγa imi nekk tuγ-iyi γebbseγ deg yiḍes alqayan, tfuṛes tagnitt tekker-d di talest, teddem-d agerrud-iw terr waynes deg wemkan-is.
Mi d-ukiγ tasebḥit-a, faqeγ agerrud yellan γer yidis-iw ur yesnuffus ara. Mi ḥekkreγ nezzeh deg-s, ukzeγ netta ur d waynu”. Imir-n kan, tenṭeq-d tmeṭṭut timibrikt tini i Sidna Sliman s yimeṭṭawen deg wallen: “Uhu, ay-Unnig-nsen ! Tameṭṭut-a la teskiddib. Agerrud amuddir d ayla-w”.

Din-din, tegzem-as awal tmeṭṭut timizwiγt twekked-as i Sidna Sliman dakken d amuddir ay d agerrud-is. Sakin la yetteddu ad yekker umerẓi imawi gar snat tlawin-nni. Imir-n dγa, yenṭeqd ugellid γer-sent: “Dayen ! Dayen ! Imi akk-a yal ta la teqqar d nekk ay d yemma-s n ugerrud amuddir, tura ihi ad nesseεdel gar-akent ed wad tellzemt i snat yid-kent”. Akk wid yellan dinna baten ed bdan la ttemseqsayen acu ara yeg ugellid amassan. yerfed Sidna Sliman afus-is yini i yiwen seg yiεessasen-is: “Ay-aεessas, ddem-d agerrud-ihin amuddir, bḍu-t γef sin s tkuba-inek tefkeḍ seg-s i yal yiwet amur-is”.

Din-din tebda tmeṭṭut timibrikt la tettiγwis ed la tessutur deg ugellid akken ad yessemmet andah-is: “Annaγ ay-Unnig-nsen ! Ttxil-k ur t-neqq ara ! Wicqa, efk-as-t i nettat, awi-d kan ad yedder”. Wamma tameṭṭut-nni niḍen, s yiwet tγara tameckukt ay tessentag Sidna Sliman akken ad yereṣṣi andah-is: “D awal uṣwib ay-Unnig-nsen ! bḍu-t γef sin akken yal yiwet segnteγ ad tuγal s tumert γer wexxam-is s tunt-is”.

Mti yerfed uεessas takuba-ines akken ad yegzem agerrud-nni, yesγel-as Sidna Sliman akken ad yeḥbes. “Efk agerrud-nni i tmeṭṭut-a timibrikt”, ay as-yenna. “Nettat ay d yemma-s, acku siwa tayemmat taḥeqqanit ara yessirmen i mmi-s tudert di tegnit am ta”.

Akk-a ihi, s tumert tameqqrant, tuγal-d tmeṭṭut timibrikt s ugerrud-is γer wexxam. Ma d takeddabt-nni timizwiγt, nettat tettwazen γer usaqqal, sakin asmi d-teffeγ yebra-y-as wergazis.

(D’après: The Baby with two Mothers, by Anne de Graaf)

Asuqel: Djaafar Messaoudi

Comments

comments

Leave a comment

لن يتم نشر عنوان بريدك الإلكتروني. الحقول الإلزامية مشار إليها بـ *